SONNET 22

[ZaunköniG]

22

Luisant Soleil, que tu es bien heureus,
De voir tousiours de t’Amie la face:
Et toy, sa seur, qu’Endimion embrasse,
Tant te repais de miel amoureus.

Mars voit Venus : Mercure auentureus
De Ciel en Ciel, de lieu en lieu se glasse:
Et Iupiter remarque en mainte place
Ses premiers ans plus gays et chaleureus.

Voilà du Ciel la puissante harmonie,
Qui les esprits diuins ensemble lie:
Mais s’ils auoient ce qu’ils ayment lointein,

Leur harmonie et ordre irreuocable
Se tourneroit en erreur variable,
Et comme moy travailleroient en vain.