Ich muß bekennen nur / wol tausend wündschen mir

[ZaunköniG]

Ich muß bekennen nur / wol tausend wündschen mir /
Vnnd tausend noch darzu / ich möchte die doch meiden
Die mein' Ergetzung ist / mein Trost / mein Weh vnd Leiden.
Doch macht mein starckes Hertz' / vnd jhre grosse Zier /

An welcher ich sie selbst dir / Venus / setze für /
Daß ich / so lang' ein Hirsch wird lieben Püsch' vnd Heiden /
So lange sich dein Sohn mit Threnen wird beweiden /
Wil ohne Wancken stehn / vnd halten vber jhr.

Kein menschlich weib hat nit solch gehn / solch stehn solch lachen /
Solch Reden / solche Tracht / solch Schlaffen vnd solch Wachen;
Kein Waldt / kein heller Fluß / kein hoher Berg / kein Grund/

Beherbrigt eine Nymph' an welcher solche Gaben
Zu schawen mögen seyn; die so schön Haar kan haben /
Solch' Augen als ein Stern / so einen roten Mund.