Il Cipress

[ZaunköniG]

Il Cipress


Tü vivast sper la s-chüra, fraida tomba,
Sco verda spraunza d' ün serain avgnir!
Inua be led, dolur intuorn rimbomba,
Simbol etern da larmas e sospir!

Il vent d' la saira dutschamaing movainta
Tieus rams, exala l' ultim sieu respir;
Il rosignol in nota bella chaunta:
"La vaira vita vò in tschel glüschir!"

Tü sentinella, guardast la dimora,
Inua dolur e larmas vaun finir,
Tü verd da spraunza, sco serain' aurora,

Chi, tias föglias mê fò inmelnir?
"L' Etern, etern da spraunza püra, vaira,
Mieu vstieu conserv' adün' in prümavaira!"