+- Sonett-Forum (https://sonett-archiv.com/forum)
+-- Forum: Sonett-Archiv (https://sonett-archiv.com/forum/forumdisplay.php?fid=126)
+--- Forum: Sonette aus slawischen Sprachen (https://sonett-archiv.com/forum/forumdisplay.php?fid=396)
+---- Forum: Sorbische Sonette (https://sonett-archiv.com/forum/forumdisplay.php?fid=599)
+----- Forum: Jakub Bart-Ćišinski (https://sonett-archiv.com/forum/forumdisplay.php?fid=600)
+----- Thema: Serbskim žonam (/showthread.php?tid=10386)
Serbskim žonam - ZaunköniG - 05.02.2012
Serbskim žonam
Woko woslep! Wucho wohłuchń! Na sewjeru
Z morjom rozniemdrjenym čołm so mały bědźi.
Z mocu přezčłowjeskej dźěła, ćeknyć slědźi,
Tola wjesło po wjesłu jom' žołmy bjeru...
Přez čołm rujo wujo dźiwje zmohi pjeru -
Z čołma muž za mužom pada žołmam k jědźi -
K połdnju zhladuja we smjertnym straše błědźi,
K połdnju žałosća tam w čołmje na sewjeru -
Ach a nihdźe, nihdźe pomocneho čołma!?
Ha! Nan, mać, bratr, sotra - wšitcy w smjertnym klinje.
Na pomoc, zo njepožrě jich dźiwja žołma!
Na pomoc, štóž we wutrobje čłowske čuće
Ma a słyši smjerćenosnych žołmow ruće,
Prjedy hač muž poslědni w tym čołmje zhinje!