Sonett-Forum

AD ÜN AMI


Hast vis? - Cun l'ir dal temp tü est domà,
gnind plü vegl e plü scort, tant cha l'immaint
riv'hoz a s'algordar sainza turmaint
eir sch'el s'volv'inavo vers il passà.

il dovair nu puder (quaint t'hast dostà?)
scurznir las alas a l'impissamaint;
in chattand a la fin sper tai, ardaint,
la vantüra tü hast dalöntsch tscherchà.

Bainischem simpla es quell'in confrunt
a l'invilgià da tuots, unic tesor,
cha l'inexpert' età sömget ardita.

Mo sapchast grà listess! cun ümil frunt
tscherchand l'imperceptibla puolvra d'or
aint il salbun dal tuorbel flüm d'la vita.