Sonett-Forum

Il chapé da Gessler.

(Monolog da Tell.)

Tiraun, tü voust cha iminchün s'inclina
Con ümla reverenz' a tieu chapé?
At crajast tü la Majested divina,
Per esser venero in möd usche?

Üngün dscharo: cha Tell vilmaing s'abassa
A salüder tieu nar rappresentant!
Sco liber hom davaunt medem el passa,
Da cour sincer, tiraun, te esecrand!

Fin als extrems est arrivo e l'ura
Da liberted, da redenziun ais co!
Servilited ans chalcha, disonura;

Sto sü, o pövel, da curadsch' armo!
Il saung dels frers possauntamaing ans clama:
»Davent da nus, davent la schlatt' infama!«