Sonett-Forum

San Luca in chamineda


Temerited ün sench in chamineda!
Da nossa val il protectur famus,
L'Evangelist, o senchited smancheda,
Ho per cumpagns salams ... ! verguogn' a nus!

Ün tratt' il sench sco chosa fümainteda;
El lò reposa per ün an inter;
Be in December vain la charn saleda,
In sa dimora quaid', al disturber.

Ün di del an, sulet, lossü Sameda,
La glüsch del dì il grand pò vair darchò,
La senchited, da paiver profümeda,

Al nouv Landamma penda sur il chò!
Mo tia gloria, cher, ais limiteda,
Darchò la saira vest in chamineda!