Sonett-Forum

Casteelen sterck-bemuert, en voor d'Helden ghebauwt,
.....Die paelen totter locht, en t'aerde-rijck vereeren,
.....Kercken ghesticht om t'lof der Goden te vermeeren,
t'Roomsche tooneel ghemetst tot een gheduncken audt,

Het Mausoleetsche graf, t'welckmen in weerden haudt,
.....De Boghen opghericht tot verdienste der Heeren,
.....Den Babilonschen torr', met al sijn ommekeeren,
En de steen-rootsen steyl, met marmer-berghen caudt,

.....Casteelen sterck, seggh' ick, kercken, tooneel, graf, boghen,
.....Den Babilonschen torr', rootsen, berghen, en moghen
Altijdt niet weder-staen de sickel vanden Tijdt:

.....Maer den naem die de Liefd' gheprint heeft in mijn herte,
.....Sal voor dees Wonders sijn berucht breet ende wijdt,
Daer naer van hier ghevoert tot in s'hemels ghesterte.