Sonett-Forum

Sijdij van Minnaers smart een onversaedlijck vraetjen
O Min? soo gaet het mij noch al voor wint voor stroom:
Hoe nauw men waeckt mijn Lief met grendel, slot, en boom
Jck stae met v noch niet int alderquaetste blaetien,
Ghij comt en steeltse mij door 't aldernauste gaetien,
En buiten moeijten van mijn slapend lichaem loom
Voerdijse lijflijck bij mijn in een soete droom;
Ghij sijt, en wiltet wel weten, een wacker maetien.
Tegen v treken gelt noch oude wijven raet,
Noch ijverige wacht, dan gouden Minne, laet
Het, bidd' jck, blijven niet bij dese clene gunsjens;
Maer, dat ghij mijn in slaep jont, jont mijn opten dach,
Dat jck genaken, eens, Liefs waere lippen mach,
Ghij cunt wanneer ghij wilt, schud wt v sack met kunsjens.